1- دايما أحتفظى بزجاجة تنضيف الصحون الفاضية عشان تستخدميها بعد كدة فى أنك تخففى فيها السايل مرة تانية بالماء وبكدة هتوفرى طبعا  وكمان ممكن تحتفظى بيها وتحطى فيها الكلور عشان ليها بوز صغير هيوفر عليكى بدل الدلق من الازازة

2-دايما حطى دواسة تحت الحوض بتاعك عشان المية او اى سوايل ممكن تقع منك

3-خلى دايما فى كيس جمبك وانتى بتطبخى تحطى فية بقايا تنضيف الفراخ او السمك او الخضار وطبعا ترمية أول بأول عشان انتى عارفة ريحتة ممكن تعمل اية ..

4-باسكت الزبالة دايما خلية نضيف اغسلية دايما بمطهر ولبسية كيس ماترميش فية اى زبالة سايلة او اى حاجة تعمل روايح فية

5-دايما بعد ماتغسلى المواعيين والاطباق بالليل طهرى الحوض بشويةخل مع صابونك السايل

6-اغسلى الخلاط بتاعك اول باول كويس عشان لونة ميغيرش مع الوقت ويصعب عليكى بعد كدة تنضيفة

7-لو مطبخك سيراميك وبيوقع علية دهون او زيوت ومش نضيف ودى طبعا حاجة بتضايقنا  كوبى علية شوية ماية سخنة وخل وبريل وادعكية كويس الاول وبعد كدة امسحية هيبقي فلة

8-لو عاوزة تحافظى على لمعان الاستالس بتاع البتوجاز بتاعك مافيش داعى انك تمسحية بالمنظفات القوية زى مذيب الدهون والحاجات دى عشان بتطفى اللمعة بتاعتة خلى دايما ايدك فيها فوطة اول باول وامسحية ونضفية بعد كل طبخة كدة مش هيحتاج لااى منظفات غير البريل

9- وانتى بتنضفى التلاجة بتاعتك دايما امسحى الجوانات بتاع التلاجة بفرشه اسنان وياسلام لو جبتى البخاخة وفيها شوية مية سخنة ورشيتي عليهم وانتى بتمسحى هيطرو معاكى وتبقى كويسة

10-بلاش المفارش اللى بتحطيها فى التلاجة على الارفف دى عشان بتمنع توزع البرودة بشكل كويس لباقى الارفف

11-دايما فضى اكياس العدس والمكرونة والحجات دى فى علب ونظفيها بشكل كويس فى المطبخ

12-الانبوبة دايما خلى بالك منها من تحت بيستخبى فيها الصراصير

13- المكان اللى تحت الحوض دة دايما نضفية ونشفية عشان مايعملش ريحة لانة مكان ممتاز للصراصير

14-التربو بتاع البصل والتوم حطى فى اخر رف فية ورقة او قماشة عشان اى ورقة او فصوص توم ممكن تقع مابين الفتحات

15-لازم تهوى مطبخك يوميا وماتخليش اى زبالة بايتة فية او اى سوايل او اكل مكشوف عشان الحشرات

16-عودى نفسك تمسحى المطبخ كل يوم بعد ماتخلصى وبالفنيك

17-دايما حافظى على شكل ونضافة الرخامة خليها دايما فاضية ماتسبيش عليها غير الغلاية مثلا وحمالة التوابل والمجات والميكرويف الحاجات اللى زى كدة

18-ماتخليش فوق التلاجة دة مكركب خلية دايما نضيف وفاضي

19-فضى مطبخك دايما من اى كركيب لو اى حاجة مش بتستخدميها اديها لحد محتاج كوبايات او حلل قديمة الحجات دى بتعمل كركبة وشكل مش حلو وممكن تتخبى فيها الحشرات ممكن تديها لاى حد محتاجها يبقى احسن طبعا

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *